Bókablogg II: Haukur á Röðli og Ljóðveldið

Ljóðveldið Ísland er reglulega áhugaverð ljóðabók. Hér er ortur bálkur um hvert ár lýðveldisins og einum betur, Svona innan úr árinu 2005:

...

"Er féð illa fengið"
spurði einhver
sjúkur útlendingur
af öfund
yfir húsunum, bönkunum
félögunum, verksmiðjunum...

...

Með trumbuslætti og básúnum
kvaddi slétthærður
gráhærður
sundurskorinn
Davíð utanríkið
og heilsaði
bankaríkinu svarta
á grösugum hólnum
Lítið eitt minni
en hæsta fjall
íslands sem
skrapp saman um
níu metra
af hreinni skömm ...

 

Í heild er þetta lifandi annáll þó að við getum stundum verið höfundi sammála og stundum ósammála.

Önnur bók sem ég ætla að geta hér í fúlustu alvöru er eftir Birgittu Halldórsdóttur og heitir einmitt Í fúlustu alvöru og Haukur á Röðli að yfirtitli. Hér er á ferðinni samtíma ævisaga sveitamanns í Húnaþingi, lipurlega skrifuð af höfundi sem á langa sögu að baki sem höfundur rómana og ástarævintýra en er hér í jarðbundnara verkefni og ræður vel við það.

Jólabókabloggvertíðin hafin

Það er ekki ráð nema í tíma sé tekið og mál að bóksalinn fari að blogga um varning sinn jafnt þó hann teljist illa hlutlaus lengur, verandi með í slagnum. Þessa dagana koma nokkrir nýir íslenskir og þýddir titlar út í hverri viku og ég mun reyna að birta nokkur bókablogg vikulega án þess að komast neitt nálægt því að blogga um allar bækur sem út koma...

Fyrsta  bókin sem ég blogga um er Harmur englanna og ég spái því að þetta verði ein þeirra bestu um þessi jól, eins og raunar algengt er með bækur Jóns Kalmans Stefánssonar. Hér segir frá snjó og ástum, morðkvendi og konum sem hefðu átt að fremja morð, landpóstum og lúpulegum lesurum eins og þessu fólki ægir saman í Ísafirði aldamótanna 1900. Heillandi og ljóðræn frásögn - en þrátt fyrir allt hrósið, ekki nærri eins góð og Himnaríki og helvíti sem kom út í fyrra.

Þetta er vitaskuld vandamál úrvalshöfunda að vera jafnan bornir saman við sín bestu verk þannig að þau næstnæstbestu falla kannski of niður þó að þau séu samt svo margfalt betri en margt af því sem miðlungshöfundar senda frá sér.

Þriggja ára afmæli

Í dag, 7. október, er Sunnlenska bókakaffið þriggja ára. Bókakaffið hefur vaxið og dafnað á þessum þremur árum og má segja að vistarverum bókakaffisins hafi fjölgað um eina á ári. Þegar við opnuðum var bókakaffið í einu herbergi. Ári síðar bættist svo við lítið fornbókaherbergi og eldhús. Á þessu sumri var enn stækkað, veröndina fyrir framan búðina var lagfærð og í ágúst opnuðum við svo Litla menningarsalinn. Þau tíðindi gerðust svo í dag á afmælisdegi Bókakaffisins að við fengum píanó í litla salinn okkar. Þannig að núna er ekkert því til fyrirstöðu að hið talaða og sungna orð blómstri í Bókakaffinu. Að lokum þökkum við viðskiptin á þessum þremur árum. -eg