Jólabókabloggvertíðin hafin

Það er ekki ráð nema í tíma sé tekið og mál að bóksalinn fari að blogga um varning sinn jafnt þó hann teljist illa hlutlaus lengur, verandi með í slagnum. Þessa dagana koma nokkrir nýir íslenskir og þýddir titlar út í hverri viku og ég mun reyna að birta nokkur bókablogg vikulega án þess að komast neitt nálægt því að blogga um allar bækur sem út koma...

Fyrsta  bókin sem ég blogga um er Harmur englanna og ég spái því að þetta verði ein þeirra bestu um þessi jól, eins og raunar algengt er með bækur Jóns Kalmans Stefánssonar. Hér segir frá snjó og ástum, morðkvendi og konum sem hefðu átt að fremja morð, landpóstum og lúpulegum lesurum eins og þessu fólki ægir saman í Ísafirði aldamótanna 1900. Heillandi og ljóðræn frásögn - en þrátt fyrir allt hrósið, ekki nærri eins góð og Himnaríki og helvíti sem kom út í fyrra.

Þetta er vitaskuld vandamál úrvalshöfunda að vera jafnan bornir saman við sín bestu verk þannig að þau næstnæstbestu falla kannski of niður þó að þau séu samt svo margfalt betri en margt af því sem miðlungshöfundar senda frá sér.

Athugasemdir

[Anna Benkovic Mikaelsdóttir, 19.10.2009 kl. 03:09]

Hlakka til...jólanna!

[Þórhallur Heimisson (IP-tala skráð) 19.10.2009 kl. 07:58]

Verða ekki bókakynningarkvöld hjá ykkur í haust?

[Kristinn Pétursson, 19.10.2009 kl. 09:45]

Bjarni ....jólasveinum fjölgar mikil þessi misserin...

 - að  þeir hljóta að vera orðnir fleiri en 365...   

gamla góða kjörorðið....   "jólasveinn allt árið"........  virðist virka...     

[Ásdís Sigurðardóttir, 19.10.2009 kl. 14:14]

Ég hlakka til að fylgjast með hér á síðu.

[Finnur Bárðarson, 19.10.2009 kl. 14:51]

Skelfing er þetta notaleg tilbreyting Bjarni :)

[Elín Gunnlaugsdóttir (IP-tala skráð) 23.10.2009 kl. 17:03]

Þórhallur: Bókakynningarnar hefjast uppúr miðjum nóvember!