Leita í fréttum mbl.is

Bloggfærslur mánaðarins, janúar 2009

Mestur sagnamaður

dimmarrosirOg áfram með bókablogg. Er enn að dunda við eina og eina úr jólavertíðinni. Ætlaði eiginlega alls ekki að lesa Dimmar rósir eftir Ólaf Gunnarsson. Þrátt fyrir dálæti mitt á höfundinum fannst mér efnið hálfvegis óspennandi. Fyllerí og vergirni í Reykjavík viðreisnaráranna. Getur slíkt nú orðið spennandi.

Líklega ekki hjá neinum öðrum höfundi okkar núlifandi. Þó Ólafur sé ekki endilega mjög djúpur eða magnaður höfundur á borð við Guðberg eða Guðrúnu Mínervu er hann hvað mestur sagnamaður sem nú heldur á penna. Já, ég held að hann geti jafnvel staðið þar framar meistara Kárasyni án þess að það sé sanngjarnt að fara þar í samjöfnuð svo ólíkra höfunda.

Dimmar rósir er þunglyndisleg saga um taumleysi, ástir, þrár og breiskar manneskjur. Skrifuð af þeirri færni að það er erfitt að leggja hana frá sér. Gildi hennar liggur samt fyrst og fremst í mannlýsingunum sem eru þó eins og nafnið bendir til giska dimmar.

Eftir þessa bók er rétt að hesthúsa einhverju bjartsýnu og uppörvandi. Hjá mér varð fyrir valinu að lesa eina af bókum Ara Arnalds frá fyrri hluta 20. aldar sem var óborganlegur sveitarómantíker sem breytti veruleikanum í Grimmsævintýri og gerði það ágætlega. Eiginlega nauðsynlegur í  melankólíu nútímans.

En sem ég er að pára þetta inn nú í stolnum stundum í búðinni fá þeir Þorvaldur Kristinsson og Einar Kárason bókmenntaverðlaunin íslensku. Þorvald hefi ég reyndar ekki lesið en báðir vafalaust vel að verðlaunum komnir. Til hamingju strákar!


Verðhrun!

Nú hafa margar af þeim bókum sem komu út fyrir jólin lækkað umtalsvert í verði.

Dæmi um verð:
Ofsi er núna á 2.490.- en var 4.990.-
Stebbi Run er núna á 1.980 - en var 5.490.-
Meðan hjartað slær er núna á 1.980 en var 5.490.-
Gullstokkur gamlingjans er núna á 1.980.- en var 4.780.-

Margir aðrir titlar hafa lækkað í verði og fleiri munu bætast við á næstu dögum.


,,Allt sem þjóðin átti og naut"

Við erum þjóðleg í tilefni Bóndadagsins og birtum eina stöku. Ástandið í þjóðfélaginu á sinn þátt í vali á stökunni:

Allt sem þjóðin átti og naut,
allt sem hana dreymir,
allt sem hún þráði og aldrei hlaut
alþýðustakan geymir.

Steingrímur Baldvinsson í Nesi

Stökuna fann ég í bókinni Vísan - Úrvalsstökur eftir 120 höfunda. Kári Tryggvason valdi stökurnar. Bókin kom út hjá Almenna bókafélaginu 1978.

-eg


,,Vofa gengur nú ljósum logum um Evrópu"

,,Vofa gengur nú ljósum logum um Evrópu - vofa kommúnismans". Kommúnistaávarpið hefst á þessum orðum en mikill áhugi hefur verið á þeirri bók síðustu vikurnar. Aðrar bækur um þjóðfélagsmál hafa einnig verið vinsælar í haust og í vetur og má þar nefna bókina Múrbrot sem er greinasafn vinstrimanna, bók Óla Björns Kárason FL - Stoðir bresta og svo auðvitað Farsældar Frón sem er greinasafn eftir Bjarna Harðarson. Nýjasta bókin í þessum flokki er bók Björns Bjarnasonar dómsmálaráðherra og ber hún heitið ,,Hvað er Íslandi fyrir bestu?" og spurning hvort hann eða aðrir kunni svör við því.

-eg


Sigurður Zetó og fleiri góðir

Í ljóðahillum bókakaffisins er að finna mörg hundruð nýjar og gamlar ljóðabækur. Til dæmis Gamlar geðveikisbakteríur Sigurðar Zeto frá 1954. 

Á kóngsins kamri

Á kóngsins kamri situr köttur
og verpir hlátri.
Í kattarins bæli liggur kóngurinn
og ælir gráti.

Lausar eru skrúfur
og létt mitt hjal.
Er það kannski þetta,
sem koma skal?

 


Metsölubækur ársins 2008

Það má segja að ljóðið hafi komið sterkt inn á árinu. Kvæðasafn Þórarins Eldjárn, ástarljóð Páls Ólafssonar og Kvæðasafn Steins Steinarrs eru meðal mest seldu bóka ársins í Sunnlenska bókakaffinu. Auk þess sem limrubók Hjálmars Freysteinssonar Heitar lummur seldist eins og heitar lummur!
Sú íslenska skáldsaga sem var hvað vinsælust á árinu er Ofsi eftir Einar Kárason og Myrká eftir Arnald Indriðason kemur næst á eftir. Af erlendum skáldsögum seldist best Friðþæging eftir Ian McEwan.
Bara gaman eftir Guðrúnu Helgadóttur og Fíasól er flottust eftir Kristínu Helgu Gunnarsdóttur voru vinsælastar af barnabókunum.
Bækur um þjóðfélagsmál urðu mjög vinsælar eftir því sem leið á árið og skyldi engan undra. Bók Bjarna Harðarsonar Farsældar Frón var vinsælust af þeim bókum.
Af bókum sem tengjast þjóðfræði og héraðslýsingum þá var Jarðabók Skeiðahrepps eftir Jón Eiríksson í Vorsabæ vinsælust en bókin Íslensk þjóðfræði eftir Þórð í Skógum var einnig mikið keypt.

Þegar á heildina er litið var árið 2008 gott bókaár og við væntum góðs af árinu 2009.

Góðar stundir.

-eg


Ný og betri fornbókabúð

Nú um áramótin voru vistaskipti í fornbókabúðinni okkar og allar óseldu bækurnar frá síðasta ári fóru í orlof í kjallara bóksalans en nýjar komu í staðin. Búðin öll endurskipulögð og mikið af forvitnilegu efni.

IMG_7692

IMG_7681

Mikið úrval af fallegum ritsöfnum

IMG_7690

Á þriðja hundrað ljóðabækur frá ýmsum tímum, raðað í stafrófsröð skálda

Mikið af nýju efni í Sunnlenska fræðaskápnum

Íslensk fræði, ættfræði, pólitík, barnabækur.

Úrval af innlendum og erlendum listaverkabókum.

Höfum sett upp tvær hillur með fágætum ritum og forvitnilegum smáritum. Þar má meðal annars finna eftirtalið, sjá hér... http://bokakaffid.blog.is/blog/bokakaffid/entry/761408/

 


Höfundur

Bókakaffið á Selfossi

NETVERSLUN OKKAR, netbokabud.is - yfir tólf þúsund titlar á frábæru verði

Bókakaffið er kaffihús og bókaverslun að Austurvegi 22 á Selfossi. Við verslum með bæði nýjar og gamlar bækur. Hér birtum umsagnir um bækur og fréttir úr kaffihúsinu og netbúðinni. Við erum líka á fésbókinni. Netfang: bokakaffid@bokakaffid.is

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Innskráning

Ath. Vinsamlegast kveikið á Javascript til að hefja innskráningu.

Hafðu samband