,,Ljóðið ratar til sinna"

Það má segja að árið 2008 hafi verið ár ljóðsins í Sunnlenska bókakaffinu. Ljóðabækur hafa selst vel það sem af er árinu. Kvæðasafn Þórarins Eldjárns hefur verið mjög vinsælt frá því það kom út í vor og þegar áhugi á því tók að minnka þá tók við ljóðabókin ,,Eg vil kveða um eina þig" en sú bók inniheldur ástarljóð Páls Ólafssonar. Þá er óhætt að fullyrða að limrubók Hjálmars Freysteinssonar læknis ,,Heitar lummur" hafi líka selst eins og heitar lummur!
Þann 13. október sl. voru 100 ár liðin frá fæðingu Steins Steinars en ljóðasafn hans var endurútgefið á árinu og má segja að lesendur hafi tekið því fagnandi.

Af þessu má því ætla að þrátt fyrir svartsýni margra varðandi ljóðið þá ,,rati ljóðið til sinna" eins og Þorsteinn frá Hamri sagði eitt sinn. Og viðskiptavinir Bókakaffisins taka eflaust undir með Guðmundi á Mýrum í ljóði Þórarins Eldjárns ,,Bókagleypir" þegar...

Hann segir: Þó er best að borða ljóð,
en bara reyndar þau sem eru góð.

-eg

Að hringsnúa líkkistunum

Fyrir nokkuð löngu dó sveitarkerling ein á bæ; hafði hún verið geðstygg
mjög og ill viðureignar og heitið að ganga aftur. Þegar kerla var dauð, lét bóndi rífa norðurstafninn úr baðstofunni og smokka henni þar út og gerði síðan stafninn upp aftur. Svo var kerling jörðuð, og bar ekki á neinu um sinn, þangað til kom fram á vetur. Fór þá að verða vart við það, að einhver var að rjátla við baðstofustafninn...

Fleira mun það og hafa verið, sem gert var til þess að gera þeim dauðu erfiðara fyrir að hverfa aftur til mannheima. Eitt með öðru var það, að hringsnúa líkkistunum, þegar þær voru bornar til grafar, úti fyrir kirkjudyrunum, til þess að rugla þá í áttunum. Þess er síðast getið, að það hafi verið gert í Grímsey á næstu árunum eftir 1830...

(Sú þrá að þekkja og nema, greinar um og eftir séra Jónas Jónasson frá Hrafnagili, Rv. 2007)

Prjónakaffi í kvöld

 

Guðbjörg Runólfsdóttir verður með prjónakvöld í Sunnlenska bókakaffinu í kvöld, þriðjudagskvöldið 4. nóvember. Þar hittast prjónakonur og spjalla yfir hannyrðum og pönnukökum um bækur og kreppur og börn og jól og prjóna og eiginmenn og matseld og stjórnmál og hagfræði og skortsölur og bændur og nyt kúa.

Allir velkomnir, meðan húsrúm leyfir. Húsið opnar klukkan 20:00 stundvíslega.

Listin að týna sjálfum sér

Haustið 2007 var haft eftir Sigurjóni Þ. Árnasyni bankastjóra Landsbankans í einu dagblaðanna að það kynni að reynast óhjákvæmilegt fyrir íslensk fjármálafyrirtæki í útrás að taka upp ensku sem vinnumál...

Þessi ummæli tóku margir að vonum óstinnt upp. Voru engin takmörk fyrir þeim fórnum sem Íslendingar þurftu að færa svo hið nýja efnahagsskipulag fengi notið sín til fullnustu.

...

Um haustið [2007] efndi svo Jón Ásgeir Jóhannesson til veglegustu brúðkaupsveislu sem hæer hefur verið haldin þegar hann gekk að eiga Ingibjörgu Pálmadóttur, heitkonu sína til margra ára og jafnframt eina auðugustu konu landsins...

(Guðmundur Magnússon: Nýja Ísland, listin að týna sjálfum sér, 113 og 191. Gagnleg lesning um öfugþróun í íslensku samfélagi.)

Ljóðskáld á leið um landið

Á liðnu sumri kom út hjá Bjarti ljóðabókin Í fjarveru trjáa - vegaljóð eftir Ingunni Snædal. Í bókinni má finna mörg ljóð um hina ýmsu staði á landinu. Þar má líka finna nokkur ljóð um Suðurland og Sunnlendinga og hefst ljóðið Úthlíð á þessum orðum:

Björn bóndi kom til dyra
hress á nærbolnum...

Í ljóðinu Flúðir segir höfundur:

hef aldrei komið hingað
er viss um að hér eru engar flúðir
frekar en foss við Selfoss
allt tómt plat

Þegar höfundur kemur að Seljalandsfossi verður honum að orði:

stór sturta
með grænu hengi
sem alltaf er dregið frá...

Þetta eru bara þrjú dæmi um skemmtilega sýn Ingunnar Snædal á landið, en það virðist vera henni hugstætt því árið 2006 kom út eftir hana bókin Guðlausir menn - hugleiðingar um jökulvatn og ást. Sú bók var mjög vinsæl á sýnum tíma og að mínu mati gefur Í fjarveru trjáa henni ekkert eftir. (Greinin birtist í Sunnlenska fréttablaðinu í sumar-eg)